香港文匯報訊（記者 子棠）高海寧（高Ling）及羅毓儀（Yuki）擔任《談婚論嫁》節目嘉賓的一集於後日（30日）播出。幻想自己是公主的Yuki 說：「想喺一個城堡裏面搞婚禮，想老公要騎住隻白馬嚟接我！而影相除了影到個城堡，後面係一片星空，最好有幾粒流星飛過，咁就最正!」高Ling的想法則相反，希望一切從簡：「想喺沙灘或者喺意大利嘅小鎮，搞個唔太大型但好溫馨嘅婚禮。」

兩位嘉賓還分享了最深刻難忘的婚宴，Yuki透露曾經出席一位Cosplay圈朋友的婚禮：「一去到我呆咗，成場人都係着住 Lolita衫，忍唔住嗌『Oh My God』，覺得成件事都好正。」高Ling則最難忘參加韓式婚宴：「有個朋友嫁去韓國，第一次出席韓式婚宴，一對新人着住韓服，現場有好多花籃，大家喺台下睇佢哋行禮，一個鐘頭後個儀式完咗，亦真係完咗，原來唔包嘢食!」

講到禮金問題，主持人亦是過來人Bob分享自身經驗：「嗰時有同太太商量，外父外母都覺得幾多冇咩所謂，最後講咗個數，唔記得係8萬8定10萬，到我畀完隔咗一排之後，外父外母回番封好大嘅利是畀我，其實畀幾多都係睇你誠意。」之後 Bob又鬼馬地化身高Ling爸爸要求100萬禮金，場面搞笑。