香港文匯報訊（記者 梁靜儀）陳山聰、劉佩玥（Moon）、張振朗、劉穎鏇、丁子朗、郭柏妍、楊卓娜、黃建東、鄧智堅及林景程等，昨日到將軍澳電視城出席無綫新劇 《奪命提示》(暫名) 拜神儀式，監製文偉鴻更大爆山聰與阿Moon拍「愛情動作戲」時，拍到連梳化都凹陷了，他又笑指因為張振朗在拍攝期間受傷，劇集幾乎要改名《奪命頭獎》。

劇集開工拍攝一個月，山聰指尚算順利，而張振朗受傷是很難避免的意外，正如振朗說犯太歲，相信他應驗了之後，今年會鴻運當頭，睇好他今年底攞視帝。阿Moon指振朗因為沒傷及眼睛，是不幸中大幸。

「地獄黑仔王」張振朗早前在拍攝期間被座地燈撞爆左邊眉角，入院縫了7針，受傷後他首次公開現身，見他貼上膠布，精神不俗。振朗表示已沒有大礙，意外大家都估不到，最緊要充滿正能量，他說：「今年犯太歲，應咗之後就順順利利。」振朗受訪表示傷勢沒大礙，自嘲經歷多，今次小事，「開工有拜神，攝咗太歲，受傷之後又再去拜神，當今次應咗，每次受傷完嗰年都幾旺，受傷千祈唔好諗埋一邊，要正能量，其實我差少少就撞到眼，我唔覺得係唔好彩囉，要正向啲。」談及無綫高層樂易玲為怕他毀容，事發當日請了整容醫生為他縫針，傷口縫合得不錯，問他可有趁機執一執其他部位？振朗強調只是縫針：「我唔做啲旁門左道嘢，只係縫針，自己純天然嘅。」

陳山聰肉搏劉佩玥整爛梳化

而山聰受訪時笑指阿Moon磅數與外形不符：「阿Moon高大威猛大家都知，估唔到啲骨真係咁重，昨（前）晚場戲講阿Moon找我晦氣，我排戲都排到濕晒，我哋又互掟梳化，搞到好攰，但拍得好開心，阿Moon仲拍到要去廁所冷靜，回一回氣。」問到阿Moon是否要減肥？她說：「已經減緊，（減了幾多？）應該唔係磅數問題，（只係骨重？）係，之後仲有好多埋身搏擊訓練，無論體形同姿勢都要訓練得好好，劉穎鏇都讚我有畀心機去鍛煉，新年我哋約定咗一齊食少啲。」她又強調山聰只是開玩笑，自己真的不是太重。說到他們拍到連梳化都凹陷了，山聰透露還有另一場更加激的。