稀思路/筆是機場

如何分辨一個人到底係愛國愛港人士，定係一個反中亂港嘅破壞分子？有啲人覺得要睇佢嘅言行，有啲人覺得要睇佢嘅所屬組織；其實，仲有一個顯而易見而且一定唔會有錯嘅分辨方法，就係睇呢個人有冇得到外部勢力嘅「獎賞」！最近，前香港眾志主席、攬炒派政客羅冠聰獲得獲美國東岸賓夕法尼亞州私立博雅大學Washington & Jefferson College頒授榮譽博士學位，以「表揚」佢喺爭取人權、民主同自由上嘅「貢獻」；對於羅冠聰獲美國嘅大學頒授榮譽博士學位，大家首先可能會質疑「佢憑什麼」，而筆者就諗到，佢得到外部勢力「嘉許」，全因佢「用心」破壞香港。

根據報道，羅冠聰之所以獲頒榮譽博士學位，係因為佢爭取「人權、民主同自由」，呢個講法真係「假到喊」，事實在於，佢根本就唔係爭取咩民主同自由，而係同其他攬炒派一樣，破壞緊香港嘅民主同自由先啱，嚴格而言，佢係一個通緝犯！

睇返公開資料，早喺2020年7月底，即係香港國安法實施咗大約一個月嘅時間，警方就以涉嫌違反香港國安法，通緝六名「流亡」海外嘅香港人，其中就包括羅冠聰，當時警方嘅消息，係指六人涉嫌煽動分裂國家及勾結外國或者境外勢力危害國家安全，一旦回港將被拘捕。到去年12月，本港嘅廉政公署就通緝羅冠聰等人，指佢哋涉嫌違反《選舉（舞弊及非法行為）條例》當中煽動人「投白票」嘅罪行。即係話，單單係羅冠聰一個攬炒派政客，就已經涉及至少兩罪而被香港執法部門通緝。

一個「走佬」外國嘅香港通緝犯，得到外部勢力嘅大學頒受榮譽學位，咁似乎係表示外部勢力係喺度「嘉獎」緊破壞香港嘅人；嚟個逆向思維，如果香港特區以至內地去嘉許喺美西國家涉嫌違法、仲要係涉及國家安全法律嘅人，唔知美西國家又會有咩想法呢？呢件事並唔係表面睇「羅冠聰獲頒榮譽學位」咁簡單，而係外部勢力又借機干預中國嘅內部事務！

對於自己獲頒榮譽學位，羅冠聰提到自己喺香港嘅母校，仲指母校已「禮崩樂壞」，筆者真心覺得，羅冠聰「面皮厚」；講到禮崩樂壞，香港嘅制度、治安以至法治，喺黑暴運動同非法「佔中」前，一直都非常良好，就係因為有羅冠聰呢類攬炒政客，令到香港法治以至治安都受到衝擊，真正想香港禮崩樂壞嘅人，根本就係一班攬炒派政客先啱！依家佢仲好意思借香港嚟抽「政治水」？如果佢有承擔，唔該就返嚟香港自首。

其實講開羅冠聰，筆者仲有一個一直都解開唔到嘅「謎團」，就係羅冠聰去咗外國咁耐，到底係靠咩「維生」呢？羅冠聰既然咁鍾意高調喊話，不如公開話畀大家聽佢嘅收入來源係源自邊度？佢係咪得到外部勢力嘅關照甚至「助養」？如果一個通緝犯得到外部勢力嘅「大力支持」，咁香港市民鬧呢啲人係漢奸，真係講得一啲都冇錯！