香港文匯報訊 闊別娛樂圈多年的吳麗珠（珠女）近日作客香港電台第一台《舊日的足跡》，與主持車淑梅分享演藝逸事，她更憶述曾目擊已故樂壇天后梅艷芳於娛樂場所被人掌摑的傳聞。

今日是梅艷芳58歲冥壽，珠女最難忘1992年5月初那個晚上，她憶述說：「我同兩位女藝人照常喺《歡樂今宵》收工後去咗九龍塘嗰間卡拉OK 玩，諗唔到竟遇上阿梅被人掌摑嘅事。其實佢係被人『質』咗一拳，我親眼見到，佢當時係由其他房間走入嚟坐低，我哋坐喺附近，嗰個人由另外一間房氣沖沖走入嚟，好似話阿梅唔畀面，我當時都唔知發生咩事，我哋驚到叫走，我冇叫阿梅一齊走，因為我見好似有人幫佢解決同面對。事出突然，我驚到開車都腳軟……後來，九龍城差館叫我哋去落口供，我當時真係好擔心阿梅……」珠女坦言：「再見返阿梅我冇再提起，知道佢去咗泰國一排，再出返嚟應該已經係解決咗。」

珠女形容梅艷芳生前是好人，「阿梅真係好好心地，佢份人好豪情，平易近人，冇扮嘢，佢企喺台上誰可匹敵？我聽羅君左講，佢有事阿梅就送咗一張冇銀碼嘅支票畀佢。我好佩服阿梅，佢嘅離開都有好多延續，佢嘅慈善、佢嘅故事，由4歲一個歌女變成一個搞慈善活動咁成功嘅人，佢冇白活到，我向佢學習。」