唐英傑被裁定煽動他人分裂國家罪及恐怖活動罪兩罪罪成時，辯方律師替佢求情，話唐英傑有「急救知識」，曾經喺示威現場「為傷者急救」，而被捕當日，佢亦身穿印有「急救」字樣嘅頭盔並攜有急救用品。噚日有似係知情者嘅黃絲喺facebook踢爆，唐英傑根本唔識處理傷者，仲批評佢案發當日嘅行為冇考慮過其他急救員嘅安全𠻹。

「圍內都知佢亂咁處理傷者」

「運輸佬vs防疫×日記」噚日喺fb專頁開post話要「講八卦」：「Fa（急救）界都知呢個（唐英傑）根本係出嚟搞笑，姐（即）係所謂嘅cosplayer（扮演者），不學無術，亂咁處理傷者，帶住一班細路喺度打wargame（野戰）上身咁，先唔評論佢揸電單車衝去『差佬』呢個『英勇』行為，但係佢做呢樣嘢嘅時候有冇諗過自己衣著（着）身份，對唔對得住手上嘅十字patch，有冇考慮過其他真係救急扶危Fa嘅安全。」

帖主仲自嘲預咗講完呢件事後會俾其他人鬧，點知隔咗幾個鐘都冇人留言鬧佢，仲見有人撐「運輸佬vs防疫×日記」𠻹。「HK Society University」留言話：「先幫你撐十秒。」「Amum Chan」就話：「原來（唐英傑）真係傻×嚟。」睇到呢啲同自己齊上齊落嘅「手足」，唔知喺獄中嘅唐英傑會作何感想呢？

●香港文匯報記者 雨航